euhouse, Author at Europe House - Page 2 of 15

Europe House мрежата преку COP28 Warm-up активностите ги акцентираше климатските обврски

Конференцијата на Обединетите нации за климатски промени (COP28) започна со будење на колективната и индивидуалната свест за климатска акција. Конференцијата се одржува во најжешката година забележана во историјата, а влијанијата на климатската криза се вистински предизвик врз човечкиот живот и егзистенцијата ширум светот.

Europe House мрежата преку COP28 Warm-up активностите ги акцентираше климатските обврски, превенцијата и транзицијата кон подобра и климатски неутрална иднина.
Првиот настан се одржа во Europe House Veles каде заедно со младите се говореше на тема #foodsecurity. Младите се запознаа со важноста на правичниот пристап до храна, трансформацијата на системот за исхрана како и отпадот кој потоа се создава.

Продолживме во Europe House Kriva Palanka co фокус на #LandUse и практиките за менаџирање со земјиште, урбаното и руралното планирање и улогата на младите во адресирање на предизвиците со климатските промени.

Tретата активност ја презема Europe House Strumica дискутирајќи за #ОдржливоЗемјоделство. Во рамките на работилницата, се наведе практичното истражување и контрола на квалитетот на почвата и водата, кои се клучни фактори за органско производство на храна.

За крај, во Europe House Bitola присутните се запознаа со богатиот биодиверзитет во нашата земја, значењето и важноста на истиот и иницијативите поддржани од Европската Унија како Natura 2000 MK и CITES. Во рамките на работилницата се реализираше теренско истражување со интерактивната апликација iNaturalist, преку која младите имаат можност да ги запознаваат, изучуваат и мапираат видовите кои нѐ опркужуваат и активно да се вклучат во движењето за спас на нашата флора и фауна.

 

 

Трет книжевен клуб за деца (Book Club Europe House Kids)!

Преку илустрираните приказни, најмалите се запознаа со најмилата „Лисичка плетачка“ и ги открија шумските тајни. Во духот на есента, сувите лисја, шалчињата и ракавичките послужија како одлични реквизити кои ја збогатија рaботилницата предводена од Ана Голејшка Џикова.

May be an image of 3 people, child, people studying and book
May be an image of 4 people, child and people studying

Моника Илкова: Сакам да го шетам Скопје и по вистинската и по книжевната мапа

Разговараше: Наташа Атанасова

Месецов на 13 ноември, Денот на ослободувањето на Скопје, беше промовирана научната студија „Книжевна мапа на Скопје“ од Моника Илкова. Сосема пригодно, имајќи ја предвид содржината на оваа книга, која хронолошки ги претставува најзначајните македонски дела во кои градот Скопје е издигнат до ниво на книжевен лик.

„Книжевна мапа на Скопје“ е водич за книжевни туристи, на кои никогаш не им е доста од шетање низ улиците на градот. За оние кои сакаат да ги помирисаат скопската раззелената пролет, да се сетат на тешката летна омарнина и кога е надвор есенски зашарано или зимски замаглено. За оние кои се љубопитни да дознаат како се живеело по скопските улици во годините по Втората светска војна или како татнела земјата во 5:17 и го урнала за 20 секунди градот во 1963 година. Но и за оние свесните за сите неправди што ги трпел и трпи градот низ годините и во крикот на скопските поети го наоѓаат гласот што самите се воздржуваат да го испуштат.

„Книжевна мапа на Скопје“ е научна студија која се занимава со дела од македонската книжевност во кои градот Скопје има значајна улога. Од каде интересот за темата на градот? И зошто токму Скопје?

Просторот отсекогаш сум го чувствувала повеќе од само локација на која се случува нешто. И во книжевноста и надвор од неа. Чувствувањето на просторот ми беше предмет на интерес уште во периодот кога го пишував мојот дипломски труд, но тогаш стануваше збор за еден поинаков простор во литературата – домот. Периодот кога ги завршував магистерските студии, живеев на неколку адреси, на неколку авионски линии, со куфер во мојата Буба, помеѓу неколку градови (и села). Некако во тој период природно ми дојде да го проширам истражувањето за просторот, од домот, на градот. А зошто токму Скопје? Затоа што колку што постојат автори што пишувале за Скопје, толку различни чувствувања за овој град постојат. Заедничко за сите е само едно, љубовта кон него.

Колку време работеше на студијата и како изгледаше бирањето на авторите и делата што ќе влезат во неа?

Веројатно неколку месеци, ако се собере сѐ заедно. Со мене влечев по десетици книги каде и да одев. Со избор на автори почнав хронолошки и некаде на средината на списокот што го правев, сфатив дека е невозможно да ги сместам сите заслужни автори за оваа книжевна мапа на Скопје. Тоа ме стави во положба да мора да бирам, но ме израдува тоа што има многу повеќе отколку што знаев и очекував.  Јас истражував, а авторите уште пишуваа и сфатив дека оваа мапа е невозможно да се заврши со оваа студија, иако се обидов да опфатам што повеќе.

Книгата го истражува феноменот на урбофилијата, односно топлото чувствување на градот во македонската книжевност, гледано хронолошки. Како млада личност, дали доживувањето на Скопје на поновите генерации писатели ти е поблиско од она на постарите?

На поновите. Јас не сум скопјанка, иако Скопје по десетина години живеење стана адреса на мојата лична карта. Но Скопје е градот во кој вистински пораснав и се градев себеси уште пред неговото последно „(из)градување“. Дел сме од исти приказни на градот, затоа ми се поблиски доживувањата на поновите генерации, иако авторите од постарите генерации ми предизвикаа носталгија за време во кое никогаш не сум живеела.

Даблин го има Џојс, Лондон Дикенс, Москва Булгаков, Париз Бодлер и Кортасар, а Скопје?

Скопје ги има Влада Урошевиќ, Гане Тодоровски, Јадранка Владова, Александар Прокопиев, Драги Михајловски, Томислав Османли,  Ана Голејшка, Иван Шопов, Владимир Јанковски, Оливера Ќорвезироска… листата е долга.

Книжевната мапа на Скопје од книгата на Моника Илкова

 

Како би ја дефинирала улогата на градот во македонската книжевност на 21. век?

Градот во голема мера ги одредува случувањата и го придвижува дејството, многу почесто, во поновата македонска книжевност, тој не е само локација, место на случување на настаните, туку скриен, независен лик.

Во книгата посебно место е отстапено за темата на ангажираноста, каде што заклучуваш дека кај авторите кои пишуваат за градот во изминатите 15 години се забележува поексплицитна ангажираност. Сметаш ли дека писателскиот глас денес е доволно гласен против неправдите што ги трпи неговиот град и неговите сограѓани?

Литературата во суштина е социјален производ, иако е создадена од индивидуалци. Оваа студија беше можност да прочитам речиси сѐ што е напишано последниве 15 години за Скопје и можам да кажам дека писателскиот глас е навистина гласен, што не значи и дека е слушнат (прочитан). Интересно е тоа што сите автори на различен начин го изразуваат својот бунт и протест: искрено и гласно, скриено, но јасно, преку сарказам, експлицитно и секогаш, позади тоа стои љубовта за Скопје.

Што претставува Скопје за тебе? И дали повеќе уживаш да живееш/престојуваш во него или да го читаш книжевно(ре)креираното Скопје? 😊

Скопје е мирис на липа во пролет и смог во зима, летна омарнина и есенска магла, симфонија од свирење на автомобили на семафор и џагор во градски парк, Скопје е сивилото на брутализмот и шаренилото на скопската чаршија. Не може еден град да е обичен, ако толку многу автори пишуваат за него. Сакам да го шетам и по вистинската и по книжевната мапа. Во книжевната ми е поудобно.

Иако е научна студија, твојата книга лесно може да се чита и во пошироки рамки отколку што обично се читаат книжевно-научните трудови. Го имаше ли ова на ум кога почна да се занимаваш со темава или отпосле го увиде таквиот потенцијал?

Од почетокот сакав да е лесно читлива и интересна за сите. Кога ја пишував, препрочитував и се прашував дали ова би им било интересно на моите родители, пријатели и, особено, на случаен минувач во книжарница. Не бев сигурна дали успеав во тоа сѐ до излегувањето на книгата, кога за неа покажаа интерес луѓе надвор од книжевните кругови. Особено ме израдува тоа што неколкумина ми рекоа дека веќе побарале дел од литературата и авторите за кои пишувам, што го сметам за мал успех на книгата.

Дали сметаш дека ја заокружи твојата научно-истражувачка книжевна мапа на Скопје или чувствуваш возбуда да продолжиш да ги исцртуваш нејзините детали?

Беше тешко да се стави точка на оваа мапа. Затоа што и за време на печатењето на книгата изглегоа нови улици и улички што заслужуваат да ги има во неа. Цело време чувствувам потреба да се извинам ако сум пропуштила барем да споменам некој автор што пишувал за Скопје, затоа што оваа книжевна мапа е заедничка, заедно ја исцртувавме и ја оставаме отворена.

Драг МКЦ, ти благодарам што правиш сè за инает на ветрот!

Драг МКЦ,

Ти го пишувам ова писмо со огромно задоцнување, од скоро една година. Сепак, и за тоа имам изговор – годината беше неверојатно тешка и трауматична.

Сега од дистанца, кога ќе погледнам наназад, беше година во која најтешкото го извлече најсилното од сите нас. Година во која покажавме дека можеме да издржиме, да се соочиме со себе, со непредвиденото, со она што лебди во воздух како тежина од оловен памук врз нашите глави. Но, и оловото има слаба точка. Кога е загреано е лесна аморфна маса која може да се адаптира кон надворешната околина пред силно да стврдне и да стане непробојно. Така и ние.

Сеедно, наскоро ќе заврши 2023, а мене ми падна таа огромна чест да напишам писание за тебе и да те раскажам во неколку страници, за оние „деца од 7 до 77“ на кои МКЦ им оставил белег. Не можам да зборувам во името на сите, секој има своја лична приказна со тебе. Но сепак, можам да ги позајмам очиве, па да се обидам низ нив да го согледаме нашето заедничко растење.

Што значи да се биде засекогаш млад? „Младоста живее од надежта, староста и спомените“. Надежта е напорна, секогаш лази по нашето постоење, како сенка од најтешкиот хорор-филм. Но благодарение на неа, сè уште сме во врска. Староста единствено постои кога ќе признаеш дека некогаш си бил млад, а спомените се тука, во секое ќоше од оваа наша зграда. Барем моите се.

Ти никогаш не треба да бидеш млад. Треба да си тука. Во сегашноста, со секој тек, со секој вител, со секоја моментална убавина од уметност која светот ја нуди, да ја впиеш. Млад е категорија која одминува, звучи како стара полица за книги кон која ретко се вртиме, за да не нè навјаса носталгија. Треба да чукаш во такт со светов, со сите срца, со оние што сè уште сакаат поубаво утре. Бидејќи конечно, мора да изрезбаме во камен: културата и уметноста ќе го спасат светот! Мораме да го повторуваме тоа секој ден, во секој час, за да одекнува во континуитет, да знаат дека без овој мал извор на уметност во центарот на Скопје, сегашноста ќе нема смисла.

Ти благодарам за сите работи што ги научивме, сега знаеме што е култура, а што естрада.

Уште да научат тие што треба.

Ти благодарам за сите прекрасни фестивали што го издржаа тестот на времето, тестот на политичките текови, тестот на незнаењето, игнорантноста, сервилноста, калкулациите, ужасот на простотилакот и површноста на „одлучувачките фактори”, ужасот на нивната празна ароганција. Еј, тука сме, твоите ѕидови издржале 50 – ќе издржат уште толку.

Ти благодарам за сите деца што израснаа овде, на кои МКЦ секогаш им е убав спомен. Ти благодарам што во твоето срце можеме да ги погледнеме и најдалечните ѕвезди, па за момент да се прашаме со најискрената детска љубопитност: „А, што е тоа таму?“

Ти благодарам за луѓето што работат тука и што успеваат да го издржат ова секојдневие, од која било причина. Реков – толку си голем што секој може да го најде своето место во тебе.

Ти благодарам што нè научи на фините работи во животот, што низ тебе протекоа илјадници луѓе од сите страни на светот, што си центар на нашата орбита. Ти благодарам што си место, платформа на која може секој да застане и да каже што има, да покаже што направил, да се гордее со себе и со својата уметност.

Ти благодарам што црташ, што пишуваш, што свириш, што танцуваш, што викаш, што правиш сè за инает на ветрот, што нема ден да помине, а да немаш некаков настан што го облагородува сивилото.

Ти благодарам, драг МКЦ, за љубовта кон сите, за љубовта кон животот. Ти си, веројатно повеќе од простор. Ти СИ.

А најмногу од сè, благодарам што од мене направи човек што се вљуби во тебе, искрено и наивно и детски, онака како што требаме сите од 7 до 77. Да знаеме да сакаме, да ја цениме уметноста, да го цениме сечиј подвиг за поубаво утре бидејќи токму тие се вистинските херои кои и покрај сè околу нас, сакаат да ни е убаво.

Драг МКЦ, на здравје!

– Маргарита Арсова

Керамичка ликовна работилница на тема ”Екологија”

По повод 3 Декември- Меѓународниот ден на лицата со попреченост, ПOУ „Маца Ѓеорѓиева Овчарова“, во просториите на Europe House Veles организираше керамичка ликовна работилница на тема ”Екологија” од инклузивен карактер за ученици со попречености од посебните основни училишта и ученици од редовните основни училишта во Велес.

Истовремено eвроамбасадорот Дејвид Гир оствари средба и со граѓанските здруженија на лица со посебни потреби: Мобилност-Велес, Мобилност-Кавадарци, Здружение на лица со церебрална парализа и други попречености-Велес , Порака-Неготино и Попи-Велес, дискутирајќи за предизвиците и потенцијалните решенија со кои тие се соочуваат.

Со успешно трасирање на патот на оваа значајна културно уметничка традиција, преку бројни креативни детски дела се обидовме да упатиме важна порака дека секој месец стоиме заедно за да ја препознаеме и славиме силата, издржливоста и уникатните таленти на лицата со попреченост.

Да ги срушиме бариерите, да го поттикнеме разбирањето и да создадеме свет во кој блескаат сечии способности.

 

May be an image of 7 people

May be an image of 9 people, people studying, table and crowd

May be an image of 3 people, people studying and gingerbread cookie

Трудови од архитектонскиот конкурс „Скопје на новата генерација“

Лотос за неа: Одржлива оаза во Градскиот парк во Скопје

Автор: Антонио Грујевски (добитник на првата награда )

Наслов на проект: Лотос за неа: Одржлива оаза во Градскиот парк во Скопје

Локација – Фонтана „Лотосов цвет“ во Градски парк – Скопје

 

Авторско образложение:

„Лотос за неа“ е проект за визионерски пејзаж и реставрација со цел да ја зајакне зелената одржливост во рамките на урбаното ткиво на Скопје, истовремено оддавајќи почит кон пионерите жени-архитекти кои играле клучна улога во реконструкцијата на Скопје по земјотресот во 1963 година. Проектот ја претставува трансформацијата на клучниот простор во Градскиот парк во Скопје во една динамична и одржлива оаза.

Во свет што сè повеќе е посветен на грижа кон животната средина, согласно шесте цели на ЕУ за животната средина, „Лотос за неа“ применува одржлива филозофија. Носи иновативни, еколошки решенија за просторот што беспрекорно ја интегрираат модерната технологија со природата и создаваат хомогени, зелени оази.

Преку вметнување на обновливи извори на енергија, ефикасно управување со водата, еколошки материјали, бујна вегетација и решение за заштита на пчелната популација во паркот, проектот овозможува поодржлива иднина за граѓаните на Скопје и за идните генерации.

Во име на историјата, „Лотос за неа“ искажува искрена почит кон жените кои одиграле клучна улога во повторната изградба на Скопје преку спомен-парк со дрва како сведоштво за нивната сила и отпорност, нудејќи мирно место за размислување и сеќавање.

Проектот има цел да ја комбинира историјата со природата. Една од главните цели е да се реставрира фонтаната „Лотосов цвет“, дизајнирана од почитуваната архитектка Мирјана Милановиќ-Волињец, со што би го добила оригиналниот изглед, како и дел од изгубеното лотосово езерце, што ја инспирирала визијата на авторот. Понатаму, од клучно значење е реставрацијата на оригиналната подна декорација преку користење на еколошки материјали и инклузивни дизајнерски решенија. Оригиналната просторна организација е надградена со нови, модерни кабини со УСБ-Ц соларни полначи и ЛЕД-осветлување.

„Лотос за неа“ содржи образовна компонента наменета за јакнење на следната генерација со знаења околу одржливи практики и свест за животната средина. Тоа претставува визионерски напор, преку кој се спојува минатото со иднината, историјата со одржливоста, уметноста со образованието. Проектот треба да претставува одржлива оаза и наследство за идните генерации.

 

 

Цели:

Главната визија на проектот е да се создаде подинамична, одржлива и инклузивна урбана средина што ги одразува духот и отпорноста на скопското минато преку изградба на одржлива иднина и додадена вредност за Скопје како Европска престолнина на културата во 2028 година.

Зелена одржливост: создавање на хармонична рамнотежа помеѓу урбанистичкиот развој и заштита на природата преку заживување на постојните зелени простори, вметнување на обновливи извори на енергија, енергетски ефикасно осветлување и спроведување на одржливо управување со дождовна вода и отпад заради намалување на влијанието врз животната средина.

Историско признание: „Лотос за неа“ ќе служи како признание за извонредните архитектки кои придонеле во реконструкцијата на градот по земјотресот во 1963 година.

Вклучување на јавноста: Вклучување на локалната заедница и посетителите на паркот во одржливи практики. Едукативни програми, мурали и работилници за урбани фарми ќе негуваат подлабоко разбирање околу важноста на зелените простори во урбани средини.

Места за собирање на заедницата: „Лотос за неа“ нуди разновидни инклузивни простори за собирање на заедницата, настани на отворено, како и релаксација, преку што се негува чувство на припадност и прогресивен дух на заедницата.                                                                                                                                                                                           

 

 

 

 

 

 

 

Автор: Антонио Грујевски


 

Преосмислување на брановите во боја

Автори: Даниела Василева, Сара Велеска, Сара Трајкова

Наслов на проект: Reimagining Colorwaves (Преосмислување на брановите во боја) (добитницина втората награда )

Локација – Кеј „Димитар Влахов“ на реката Вардар (од зградата на МАНУ до бензинската пумпа на „Макпетрол“)

 

 

Авторско образложение:

Вгнездена помеѓу реката Вардар и административниот и културен дел од центарот на градот, оваа локација е позната по своето административно и културно значење, поради легендарната зграда на МКЦ како симбол на културна и општествена енергија и каде што се одржани безброј настани и собири. Во денешно време, местото ја задржува својата мирна атмосфера и служи како врска помеѓу луѓето и нивниот работен простор и живее само во одреден период во текот на денот. Сепак, неговиот потенцијал како динамичен и просперитетен центар е опиплив поради блискоста со центарот на градот и неговиот прекрасен поглед од брегот на реката.

Во обид да се вдахне нов живот во овој динамичен урбан простор, предлагаме сериозна интервенција по должината на улицата покрај брегот на реката, интервенција што ќе го заштити нејзиното историско значење, а истовремено ќе навести нова ера на енергија и намена. Нашата визија е да се зајакне овој простор преку додавање појаси во боја што ја симболизираат транзицијата од минатото кон иднината. Овие појаси во боја ќе бидат исткаени во улицата и беспрекорно ќе се интегрираат во околината.

 

Хоризонтално гледано, ја делиме улицата на две посебни зони, каде што секоја ќе има посебна намена, истовремено зачувувајќи ја суштината на културните и административните институции што го дефинираат просторот. Првиот дел од улицата, веднаш до легендарната зграда на МКЦ, се замислува како динамичен простор за култура и дружење. Тука, уличниот пејзаж ќе биде дизајниран да ги привлекува луѓето и ќе овозможува интерактивна средина.

Оттука почнуваат трите појаси што се движат по должина на улицата. Еден од појасите се движи вертикално и формира различни простори за дружење и искусување на просторот. Дел од него се и клупите за седење, места за игра и качување, бар за интеракција, како и видиковец што нуди поглед кон реката и спротивната страна. Можно сценарио во овој дел е опцијата за улична уметност, мурали и уметнички инсталации што оддаваат почит на богатата културна историја на просторот и поттикнуваат креативност.

Вториот дел од улицата, што ги сервисира корисниците на административните згради, ќе нуди соодветна атмосфера за работа и соработка. Овој сегмент ќе даде приоритет на функционалноста и ефикасноста преку: работни зони дизајнирани за да ги задоволат потребите на административниот кадар, станици за кафе и киосци за потребите на луѓето кои работат тука.

Оваа интервенција има цел да создаде хармонична рамнотежа помеѓу културата и администрацијата преку зголемување на привлечноста на овој урбан простор.

 

Автори: Даниела Василева, Сара Велеска, Сара Трајкова

 


Автори: Натали Велеска, Ален Цветковски и Дона Митровска

Наслов на проект: SpineX (добитници на третата награда )

Локација –  булевар „Никола Карев“ (Пластичарска учица)

 

Авторско образложение:

Изборот на локацијата за овој конкурентен проект да биде булеварот „Никола Карев“, познат во колективната меморија како „пластичарска улица“, се јавува поради фактот што таа претставува традиционална трговска улица полна со мали занаетчиски и трговски единици. Многу луѓе ја посетуваат оваа локација за да купат конкретни производи и тие најчесто доаѓаат со автомобил, што носи со себе неколку проблеми што го намалуваат вкупниот квалитет на понудата.

Основната идеја за оваа улица, преку нашиот архитектонски и урбанистички пристап, потекна како резултат на револт кон државата и нејзиниот третман кон улицата, и покрај фактот што таа неодамна е реконструирана. Затоа што не постои можност или иницијатива за решавање на хаотичните услови и проблеми што се дел од модерната верзија на „Пластичарска“, нашето решение е таа да се подигне на ново ниво – улица за велосипеди и пешаци изградена како заоблена лесна структура во вид на мост, направена од скелетен систем со челични држачи, обложени со бетон и скулптурална форма. Таа ќе содржи и ќе поврзе различни содржини за друштвени активности и инклузија за сите луѓе. Овој „лесен“ скелетен систем е придружен со цилиндрични бетонски „кули“ што ќе служат како вертикални врски до нивото на улицата, со што овозможува структурна стабилност и зајакнување.

Целта е да се решат голем број проблеми со кои се соочува оваа локација, првично поради модерниот начин на живот и зголемениот број возила во градот, особено на оваа улица. Ова директно ја намалува безбедноста на пешаците, со оглед на тоа што нема соодветни пешачки премини и несоодветното преминување на необележани делови од патот е редовна појава. Автомобилите се паркираат на тротоарите и нема посебни велосипедски патеки или безбедни коридори или активности за лица со попреченост. Поради тоа, нашето решение нуди безбеден коридор за пешаци и велосипедисти, безбеден премин од едната страна од булеварот на другата преку неколку платформи со скали и лифтови и долги рампи за велосипеди на крајот од патеката.

Друга карактеристика поврзана со овој дел од градот е дека речиси сите постојни капацитети се отворени до одредено време и потоа се затвораат, со што улицата станува целосно неатрактивна и не нуди други поволности за да привлече повеќе посетители и да заживее околината. Затоа нашиот проект вклучува голем број на друштвени и културно-забавни активности, како што се амфитеатар за мали културни настани, изложбени панели на отворено, мали отворени комерцијални и занаетчиски единици што ќе им дадат можност на локалните занаетчии да ги прикажат нивните традиционални рачни занаети од регионот. Оваа пешачка улица исто така вклучува неколку места за релаксација и рекреација, како и отворени работни места во форма на линеарни клупи, лежалки, маси, столови, јавни тоалети и места каде што посетителите можат да купат храна и пијалаци.

Еден од најзначајните квалитети што го постигнавме со ова решение е збогатувањето со ниско и високо зеленило, што моментално го нема на постојната локација. Тоа е придружено со амбиентални водни површини и детски реквизити за забава и вклученост на најмладите. За да се постигне енергетска ефикасност на ова решение, вклучени се посебни кружни соларни панели на секоја од кулите, за да се акумулира и да се користи соларна енергија за функционирање на сите капацитети и за осветлувањето на пешачкиот мост.

 

 

 

 

 

 

 

 

 

 

 

 

 

 

 

 

 

 

 

Автори: Натали Велеска, Ален Цветковски, Дона Митровска

EUROPE HOUSE СКОПЈЕ ГО ПРОСЛАВИ СВОЈОТ 4 РОДЕНДЕН СО АРХИТЕКТОНСКИ КОНКУРС

Скопје, 13 ноември 2023 година

Јуроп хаус Скопје ја одбележа својата четврта годишнина со спој на наследството и визијата за иднината, одржувајќи изложба и церемонија на доделување награди за конкурсот за архитектонски и урбанистички дизајн „Скопје на новата генерација“. На овој настан беше прикажан талентот на младите архитекти кои придонесуваат за урбаниот развој на Скопје.

На натпреварот пристигнаа 12 пријави од 24 млади архитекти, а секој од нив претстави планови за обнова на различни локации во градот. Првата награда ја доби „Лотос за неа“ (“Lotus 4 Her”) на Антонио Грујевски за фонтаната „Лотос“ во Градски парк Скопје. Втората награда ја добија Даниела Василева, Сара Велеска и Сара Трајкова за „Реимагинирање на боените бранови“ (“Reimagining Colorwaves”), за кејот „Димитар Влахов“ покрај реката Вардар. Третата награда им припадна на Натали Велеска, Ален Цветковски и Дона Митровска за нивниот проект „СпајнХ“ (“SpineX”), наменет за ревитализација на улицата „Пластичарска“.

May be an image of 9 people

Настанот се одржа во зградата на Централната пошта во Скопје, место со значително историско значење, што „Europa Nostra“ го стави на листата на седумте најзагрозени културни споменици во Европа. На 26 јули, датум што се совпаѓа со 60-годишнината од разорниот земјотрес во Скопје, „Европа Ностра“, во соработка со Институтот на Европската инвестициска банка, го сврте вниманието кон итната потреба за реставрација на зградата. Ова чувство се одрази и во забелешките на евроамбасадорот Дејвид Гир, нагласувајќи ја важноста за итна акција со цел да се зачува оваа историска градба.

„Денес стоиме овде во Пошта, веројатно најзначајниот пример на бруталистичка уметност; естетика што го обликуваше постземјотресниот архитектонски идентитет на Скопје. Да се потсетиме на културното наследство што треба да се заштити и негува. Денес, Пошта сè уште нема покрив и сѐ поголем е ризикот повеќе да не се користи и да се распадне. Сепак, Пошта, да ги употребиме зборовите на Сартр, не прифаќа пораз! Ниту ние. Решивме да го одбележиме четвртиот роденден на  Europe House токму тука. На Денот на ослободувањето на Скопје.“, истакна амбасадорот Гир.

Во нејзиниот говор, министерката за култура, г-ѓа Бисера Костадиновска-Стојчевска, му се заблагодари на амбасадорот Гир и истакна дека “Ова значајна пригода, на Јуроп хаус Скопје од културен карактер успеа да ги зближи историјата и иднината, со креативноста на студентите по архитектура.” Таа додаде дека овој конкурс оди чекор напред и го премостува минатото со аспирациите за иднината.

Конкурсот „Скопје на новата генерација“ го оценуваше жири од 5 члена од сите пет архитектонски факултети во Скопје, (Меѓународен Балкански универзитет, Универзитетот Американ Колеџ Скопје (УАКС), Универзитетот МИТ, Факултетот за општествени науки (ФОН) и Универзитетот „Св. Кирил и Методиј“ Скопје).  Проф. д-р Бојан Карнаков, во име на жирито објасни дека:  „Главната цел на конкурсот е да инспирира иновативни идеи за архитектонски и урбан дизајн што би го зајакнале чувството на заедница во јавните простори на делови од градот врежани во колективната меморија на Скопје; младите архитекти до 35-годишна возраст требаше да се фокусираат на повторно осмислување и/или преуредување на овие делови од градот, со цел да се создаде одржлива и инклузивна средина“.

Победничкиот проект „Лотос за неа“ (“Lotus 4 Her”), изработен од младиот архитект Антонио Грујевски, претставува визионерски пејзаж и реставраторски проект чија цел е зајакнување на зелената одржливост во урбаното ткиво на Скопје, притоа оддавајќи почит на жените-архитекти, пионери во областа, кои одиграа клучна улога во обновата на постземјотресно Скопје во 1963 година. Во својот поздравен говор, Грујевски рече: “За еден месец сме во 2024, а сите политичари и дел од нашите колеги сеуште зборуваат за Скопје 2014. Светот се движи напред. Европа се движи напред. Имаме предизвици со климатските промени, со енергетската независност и со загадувањето. Ова се предизвици на кои што мораме да се фокусираме, и да се придружиме кон визиите на Европската Унија.”

Изложбата во Централна Пошта ќе биде отворена за јавноста во наредните три дена, од вторник до четврток, од 12:00 до 15:00 часот.

 

Скопје на најмладата генерација!

Во склоп на 4 роденден на Europe House Skopje  организиравме архитектонската работилница за деца.

Најмладите се запознаа за четирите значајни скопски музеи, – Музеј на град Скопје, Даут-пашин амам, Музеј на современата уметност и Музеј на Македонија и како овие културни институции ја негуваат историјата и уметноста.

Љубопитни, тие се охрабрија да создадат свои минијатурни архитектонски ремек-дела под менторство на архитектите Маргарита Поповска, Милка Черепналковска, Маја Доновски Лукаревска и Мартина Петковска.

За крај, на забавен и интерактивен начин, користејќи разни техники – колажи, цртежи и макети го прикажаа своето решение на поставената задача.

May be an image of 10 people, people studying and table
May be an image of 5 people and people studying

Во соработка со Младите Можат, Europe House мрежата се приклучи на #SocialDay 2023 иницијативата.

Со оваа активност, средношколците беа поканети да заменат еден ден на училиште со 8 часа на работа под менторство на локалните Europe House тимови.

Europe House Veles
Анабела и Димитар- волонтери на Младински центар Велес, се нурнаа во процесот „Oд идеја до реализација“.
Тие имаа можност да бидат дел од секојдневните активности- подготовки, комуникација со соработници како и сите пропратни елементи за успешно реализирање на настани.

Europe House Kriva Palanka
3 групи на волонтери имаа шанса да бидат практиканти во различни области:
1. Во Ранковце се запознаа со работата на The Countryside , чување на животните и нивната улога на пријател на човекот
2. Во #europehousekrivapalanka работеа на организирање настани од логистички аспект и подготовка на просторот за предвидените активности за тој ден
3. Во Кратово, се запознаа со функционирањето на Невладините организации и користењето на опремата и структуирањето на една поткаст епизода која ги опфаќа младинските теми, општеството и културата

Europe House Bitola

Волонтерите се запознаа со начинот на работата, мисијата и функционирањето на локалниот Europe House, како и типот на содржини произведени за млади кои се одраз на европскиот дух. Ентузијазмот на младите волонтери да стекнат нови вештини ја покажаа нивната волја за личен развој и раст.

May be an image of 2 people, people studying and text

May be an image of 2 people

May be an image of 2 people

Subscribe To our newsletter!