И оваа пролет, повторно во нов сјај, го славиме месецот на Европа во креативен и енергичен амбиент. Впрочем, во овие пријатни и топли пролетни денови, низ неколку градови во нашата земја се организираат серија настани посветени на културата, уметноста и биодиверзитетот. „Месецот на Европа“, пред сѐ, е прослава на нашето заедничко културно наследство. Секој град, со својата уникатност, придонесува во комплетирањето на мозаикот од новите искуства. Без разлика дали сте љубител на визуелната уметност, музиката, поезијата или, пак, ве интересираат дискусиите од различни технолошки и еколошки теми, овој мај е одлична можност да се запознаете со богатата програма на Europe House.

Концерт на музичка временска машина

Годинешниот „Месец на Европа“ е исполнет со возбудлива низа настани, секој креиран да ја разгори креативноста и да ја поттикне културната размена на различни перспективи и идеи. На овој начин може да се поттикне и да се инспирира духот на заедницата, сплотувајќи ги сите посетители во една прекрасна синергична атмосфера. Помеѓу многубројните настани од опсежната програма на „Месец на Европа“, најистакнат е „Концертот на музичка временска машина“, носталгично музичко патување што ќе ја маѓепса публиката од сите возрасти.

Пред платото на УКИМ ќе можеме да го слушнеме богатиот репертоар на домашни артист(к)и и бендови: „Фанк шуи“, „Пијан славеј“, Дина Јашари, диџеј Гоце и ЛД Пистолеро, „Сетстат“ и Марија Каева, „Ретро кабаре“. Музиката на којашто ќе играме и ќе се забавуваме е всушност комбинација од старото и новото време. Користејќи ја звучната временска машина, артистите ќе се обидат да нѐ вратат назад во енергичната рок-ера и истовремено да ја претопат во современиот звук. Оваа уникатна фузија ќе нѐ врати наназад во времето и ќе евоцира многу стари спомени, а истовремено ќе воведе свежи звуци што резонираат кај денешните музички слушатели.
Сигурни сме дека оваа мајска сесија ќе можете да се опуштите со одлична музика и да ги заборавите за миг обврските од денот. Музичкото патување во временска машина нека нѐ однесе во светот на нотите и тоновите, телепортирајќи нѐ во едно ново доживување. Ве повикуваме заедно да ги пееме старите добри рефрени, но овој пат во нови аранжмани на бендовите од современата музичка сцена. Зад воланот на временската машина управува Драган Б. Костиќ, кој ќе се погрижи патувањето да биде нежно и беспрекорно. Покрај музичката авантура, ќе можете да го ѕирнете малиот саем на книга, совршен за книжевните љубители кои сакаат да откријат нови книги за читање. Потем, отворена ќе биде и винил поп-ап продавницата, што е одлична шанса за музичките фанови да ги прошират своите колекции со ретки плочи. Ако останете гладни додека танцувате, пред платото ќе има избор на вкусната храна што ќе се продава на штандовите. Комбинацијата од музика, книжевност и храна ќе создаде енергична и привлечна атмосфера, правејќи го „Концертот на временската машина“ настан што не треба да се пропушти.

Што ќе се случува во другите градови низ земјата?

Europe House Крива Паланка

Europe House Крива Паланка стана центар на младешка креативност со своите интерактивни иницијативи за младински развој. Прославувањето на месецот на Европа почна на 10 мај во Кратово со панел-дискусија, каде што се разговараше со Маја од „Перкалус дизајн“ и Бојан од „Бојан дизајн“ за иднината во креативно-дигиталните професии во полето на графичкиот дизајн, притоа нагласувајќи ги иновативните решенија на пазарот за UX/UI дизајнот. Една недела подоцна, на 17 мај, Куманово беше домаќин на мултилингвално поетско матине на коешто се прославија лирските таленти на младите од регионот. На мултилингвално поетското матине посветено на Денот на Европа во Куманово ги слушавме преработките и авторските песни на „Номад бенд“, преточени во стихови од младите поети од Книжевниот клуб Куманово. Пиксел по пиксел, патот нѐ донесе назад во Europe House Крива Паланка, каде што сликавме на жив мурал, а вечерта заврши со концерт на талентираниот бенд „Фолтин“.

Europe House Струмица и Europe House Велес

Велес и Струмица за овој европски месец се облекуваат во зелено руво. На 27 мај, Велес ќе биде домаќин на Саемот за вино во Europe House на 27 мај, каде што ќе се слават локалните лозари и нивниот придонес во полето на земјоделството. Идејата на овој настан е да ги привлече енофилите, односно љубителите на виното, и да го нагласи пресекот на традицијата и културата. Посветеноста на Струмица на зелената култура е очигледна во нејзината поставка на еколошкиот настан на 28 мај – изложба на биодиверзитетот на Дојранското Езеро, која ќе ги едуцира и ќе ги инспирира посетителите за важноста на зачувување на нашето природно наследство. Вечерта на 20 мај уживаме во звуците на симфонискиот рок-концерт во Гевгелија.

Europe House Битола

Битола е препознатлива по својата посветеност да ја негува новоафирмираната културна сцена на младите. На 15 мај, настанот посветен на театарот ќе ги заинтересира сите љубителите на книжевноста, оставајќи им простор новите писатели да ги покажат своите таленти. Културната гозба продолжува на 17 мај со класичен концерт во историската Офицерска сала, по што, следниот ден, на 18 мај, ќе следува изложба на отворено и диџеј-сетови во паркот на Офицерската сала. Музејот Битола ќе послужи како заднина за овој спој на историјата и модерните звуци на новото време, создавајќи уникатно културно искуство за сите постели.

Europe House Струга

Europe House Струга ги покани младите поети да учествуваат на отворениот повик за наградата „Млади поети“ на 9 мај, поттикнувајќи ја следната генерација книжевни таленти. На 22 мај, додека во Скопје ечи музичката временска машина, во Струга ќе го сведочиме сликањето на муралот за биодиверзитет, симболизирајќи ја хармонијата помеѓу човечката креативност и природата. Потем, на 30 мај е официјалното и свечено отворање на Паркот на поезијата-Струга придружен со визуелен и музички перформанс. Ова културно обележје послужи како доказ за трајната љубов на Струга кон поезијата и уметноста.

Доротеа Огненовска